She'rlar

TUSH

Bir oy bo’ldi,

Takror-takror

Men bir xil tush ko’raman,

Tushlarimda mudrab yurgan

El ichida yuraman.

Ular bilan

Men ham mudrab

Asta qadam sudrayman.

Bu — tush, deyman,

Uyg’on, deyman,

Uyg’onolmay mudrayman.

Har tun shu hol,

Falak bergan

Bu ne balo qiynoqdir!

Ey xudoyim,

Ey xudoyim,

Kechang buncha uzoqdir?!

E. Vohidov 1991

***

Dod soling ne kechar holimiz,

Alamdan jonimiz qiynoqda.

Olamda topilmas molimiz-

Vaqtimiz yonmoqda, yonmoqda!

Bir yonda, biz topib ulgurmay

Ming-minglab savolga javoblar,

Hatto biz varqlab ulgurmay

Javonda yonmoqda kitoblar!

Odamlar, uyqudan uyg'oning!

Shoshiling, qidiring tez najot.

Jon kuysin, qalb yonsin, siz yoning

To yonib ketmasin bu hayot...

E. Vohidov

***

Ko'cha chiqsang, ko'cha bozor,

Kunduz tugal kecha bozor,

Bir shaharda necha bozor,

Kitob bozori qaydadur?

O'ng tomonda go'sht bozori,

Ichak-chavoq, to'sh bozori,

Narxi boshga musht bozori,

Kitob bozori qaydadur?

Teparoqda don bozori,

Kulchan patir, non bozori

Oru nomus, shon bozori

Kitob bozori qaydadur?

Sal narida un bozori

Qo'qib yotgan jun bozori

Qalpoq bozor, to'n bozori

Kitob bozori qaydadur?

Bir yon pichoq, qin bozori

It, mushukka in bozori

Qo'qon, koreys, Chin bozori

Kitob bozori qaydadur?

Xonatlasu satin bozor

Tarashayu o'tin bozor

Tamakiyu tutun bozor

Kitob bozori qaydadur?

Olib qoling - gul bozori

Valyutayu pul bozori

Ana ko'mir, kul bozori

Kitob bozori qaydadur?

Pivo, vino, aroq bozor

Bolta, tesha, o'roq bozor

Fonu, qandil, chiroq bozor

Kitob bozori qaydadur?

Handalagu qovun bozor

Atir, upa, sovun bozor

Kirsang holing zabun bozor

Kitob bozori qaydadur?

Qilinsa bas bir yo'rig'i

Topilar anqon urug'i

Lozim bo'lar ko'p "qurug'i"

Kitob bozori qaydadur?

Ho'p izlasang topiladi

Lekin ancha chopiladi

Tonguningcha yopiladi

Kitob bozori qaydadur?

Topolmasang qilma ta'na

Qurib ketsin shu ordona

Eng yaxshisi kutubxona

Kitob bozori qaydadur?

(K.Sindarov)

***

UZOQ BIR NUQTAGA...

Uzoq bir nuqtaga termulgancha jim

Mo’ysafid nogahon ko’zlarin yoshlar…

“Zamon o’zgardimi, odamlar… balkim… 

Ne uchun beboshroq hozirgi yoshlar?

Bilmaydi, oddiy bir “salom” so’zini,

Qo’llari ko’ksining visoliga zor.

Uyalish tark etgan chaqnoq ko’zini,

Ma’nisiz seriallar aylayapti xor.

Kitob dunyosidan yiroqdir ular, 

Navoiydan bitta satr bilmaydi. 

Qiziqib asarlar o’qishmas tunlar,

Nasihatga aslo quloq ilmaydi… 

Vaqt bekor o’tgandan achinmaydi hech,

Aniq maqsadidan yo’qdir nishona.

Tushunar ekanmi bo’lganini kech,

Devorga urilgan chog’da peshona?

Uzoq bir nuqtaga termulgancha jim,

Mo’ysafid ko’zlari to’ladi yoshga

Chin dildan istaydi, imkonin topib, 

Aylashni nasihat har bitta yoshga:

“Yoshsan… 

Quvvating bor… 

Shijoat bisyor… 

Bilim ol! Ilm o’rgan!

Ollohni tani!

Qalbingni pok ayla, bo’lmasin g’ubor,

Egam ham, haq yo’lda qo’llar bandani…

Jigarim!

Avlodim! ertam, indinim!

Imonni but ayla,

E’tiqodni do’st!

Millatning sha’nini boshingga qo’yib,

Shu Yurtga munosib farzand bo’lib o’s!”

Mo’ysafid uzoqqa termular, besas… 

(Mas'ud Mahsudov)